–Bi us tou Huus...
Hier vertell ick aower Heidebuurn, dei sick in fräuheren Johren mehr recht un schlecht dorschlaon mössen. Dei Tied wör hart, et güng mitünner recht raubeinig tou.
Aower wi sägg man: Man mott sick tou hölpen wäten.
So wör dat uck bi us in Paddewat.  Wo is denn dat – denkt Gi bestimmt. Dat sägge ick nich. Denn sons häbb ick Jou aal vörn Huuse staohn un mit miene Ruhe is et vörbi.
Ick vertell Jou leiwer wat van mi un ut use Gägend, dann käön Gi Jou sülwes ein Bild maoken!

–Kläönschnack in Paddewat...
Fräuher dröpen sick Lüe noch öfter, üm sick tou ünnerhollen un sick wat tou vertelln. So wör dat uck bi us. Dat heit, hier güng dat eiher in Targereie aower. Sick wekke tou toustäken, up gor nich feine Ort,  hörde nu maol dortou…

—Kerls dröpen sick tou’n Fräuhschoppen off bi’ne Schlucktied inne Wirtschaft bi Poulmanns. Paul,dei Wirt, ein Junggeselle, is’n Schlaopmüssen. Wenn nix  tou doun is, legg hei’n Kopp  up´n Dischk – un schlöpp. Hei huust mit Marie, eine olle Huushöllerschke, tousaome…
Dei Stammgäste sünd aale ’n Tacken öller. Ick stell einige maol vör:
Brow Bernd – gansen Schlauen, mennt hei van sick. Am leiwsten dait hei dei ännern Gäste targen…
Pintken Hermann – Pintkendraiher (Drechsler) Hei kann up siene Draihbank lüttke Pintken/Holltdeile maoken…
Pintken Bernd, sien Brouer. Stellmaoker, groten Eigenpeiter…
Kütemeiers Korl – dei olle Doktor. Hei klaogd jümmers gern: Oh, wat kellt mi doch dei Küt…
Plietschken Fennand – dei Schnieder. Süss plietschk mit ut, sägg hei jümmers bi’t anprobeiern…
Klatten August – aowertügte Junggeselle, nimmp kien Blatt vör’n Mund, bring nix ute Ruh…
Höllers Franz – Hannelsmann, spält gerne ein frommen Mann. Hei hannelt mit aals, egaol off zwei- oder veierbeinig…
Präumken Gerd –  sütt gediegen ut, wenn hei sien Präumken hen un her jaogt…
Mäöhlen Willi – dei Windjaoger. Einer van dei Lessden dei midde Windmäöhlen maohlt…
Plaggenbühls Clemens – gansen Neischkierigen, hätt in Paddewat grote Placken tourecht maokt, will gern bäten grot doun… 
Kraomers Jonathan, dei olle Lehrer, hätt grot Wäten, is aower manges gans wiese…
Köttken Jan – is’n gansen Nauen, weit aals bäter. Hei kräönket gern, wi leip hei dat hätt…
Un einige mehr…

—Froulüe hülln ehr Kaffeekränzken immer bi Huus aff: „Wenn leipe Tungen sägget, dat wi tratscht, dann sünd dei neidisch!  Wi willt blots wäten, wat et Neies giff!“
So dröpen sick maondaogs nömmdaogs bi’n Köppken Kaffee:
Pastors Liese – rut tou kriegen, wat Lüe so denkt, is ehr Läben! Deswägen hätt sei sick’n Sarg mit Fenster bestellt, dormit sei seihn kann, wer up ehre Beerdigung schrait.
Kütemeiers Agnes – schall Pastors Liese sägg häbb’n, sei schull doch’n Pastor, as dei krank wör, fraogen, off sei för ehm nich Bichte sitten kunn…
Braohms Hedwig – wenn sei nich wat Neies gewohr wern kann, denkt sei sick wat ut. Un so mott Pastor ehr andauernd tourechte stöten…
Kitzken Libett – dei Sodalin Elsbeth mott immer ehrn Schmeer toubidaon. Un dat nich immer up feine Daomen-Ort…
Pöltz Hilde – dei Polizisten-Witwe. Sei mennt  immer, wenn ehr   Kerl noch man wör, geew et mehr Ordnung…    

—Jung un Old: Vandaoge hört sick dei Kläönschnack gans änners an.
Dei Ölleren schnackt am leiwsten aower fräuher un drückt sick dorbi faoken tweidütig ut.
Jüngere bruukt dorgägen gern wat affköttet, so’ne „Internet-Spraok“, off dat, wat mehr utländisch kling. Wenn sick dann Jung un Old ünnerhollt, hört sick dat gediegen an.
Hier gaiht et üm Opa un Oma, dei van ehre Enkelkinner toun Äten inloorn sünd.
Dei Enkelkinner, so anne twintig, dat sünd Erna un Frieda mit ehre Freunde un Jan mit siene Freundin…

–Wo heitde dei noch…
So klüng dat immer, wenn man in lustiger G’sellschupp tousaome köm. Un dann güng et los – jeder geew wat d’tou – vertell eis maol!
Dormit disse G’schichten – Däönkes, Lieder, Täöge –  un wi man’t uck nennt, nich vergäten werd, häbb ick se upschräben. Deilwiese häbb ick mien Schmeer dor toubidaon. Ick häbb mi dacht, wenn et nümms kellt, bruukt et uck nich so genau tou stimmen… Hauptsaoke, dat kling gout!

–Noch wat: Laot sick kiener angräpen feuheln: Wenn sick dor einer bi miene G´schichten  woller find,  dann is dat nur toufälligun hätt nix mit miene Vertellsel tou doun.

Hier is ein Deil ut miene Sammlung. Mehr Däönkes un G’schichten staoht in mien Cirkel-Album „Bi us tou Huus in Paddewat“!

Cirkel-Album = Läsen un wietergäben! Sägg Jou dat tou? Dann roop mi an > 0176-43400153