18.05.2025/KW 21 – dei Ehebruch…
Die lüttke Fränzi har bi dei Schoule dat Wort Ehebruch hört. Wat dat dann wull is, dachde hei. Dat schall man uck bichten mäöten, so har hei wieter hört.
Dat wull hei nu genauer wäten. Hei suusde hen nao siene Mouder un frög nao. „Mein Gott Junge“, sä dei, „wo häss dat dann hört?“ „Jao, najao – dat weit ick uck nich mehr – aower wat is dat dann äöwerhaupt?“ „Jao, dat weit ick nich“, mennde siene Mouder, „dor fraog usen Papp`n man nao.“
Fränzi hen nao’n Vaoder. „Papp’n, wat is Ehebruch?“ Dei har buld sien Präumken d’bi verschlaoken, wüss eiers gornich, wat hei säggen schull, tückschullerde ’n poormaol un stäöterde dunn: „Dat – dat weit ick nich so genau. Sowat dou ick uck nich – ick meen, sowat kenn ick nich – och Gott Jung, fraog doch leiwer use Mamme, dei weit doch sowieso aals bäter!“
„Dat stimmt aower nich“, mende Fränzi dorup, „ick häff Mamm‘ all fraogt, dei wüss dat nich. Ick mott dat aower wäten, wenn mi eis einer fraogt – villich morgen all dei Köster inne Schoule?!“
„Du olle Drinnspeiter“, sä Meyers Pappe dunn, „dat is doch dumm Tüg, wat du aal wäten wullt. Ehebruch, Ehebruch – dat is“ -un hei jaogde sien Präumken hen un her- „wenn man, wenn du inne Böxen maoks. Un nu treck aff, ick mott wat doun…“
Na ja, Fränzi wör för’t eiersde toufräe un trullde af. Aower dunn bi dei nächs’n Bichte köm dat dicke (off sägget man bäter, dat dünne!) Enne! As Fränzi siene Leipkeiten uptellde, sä hei touless: „Un dann habe ich zweimal Ehebruch getan…“
Pastor schlök eiers. Nu kennde hei’n Fränzi aower gout un frög liese trügge: „ Sägg mi Fränzi, wie häss du dat denn maokt..?“ –
Fränzi gans bedreuwt: „Dünne, Herr Pastor – gans dünne!“
–
Tückschullern = Achselzucken; Präumken = Kautabak; Köster = Lehrer; Drinspeiter = drinsen/betteln; Böxen = Hose; trullde = trollen Leipkeiten = kleine Sünden