06.07.2025/KW28- Jung un Old…
Dei Öllern sünd in Urlaub. Dei Kinner, häbbt Oma un Opa toun Middagäten inlaoen. Dei beiden frait sick, dat sei sick maol‘n bäten mit junge Lüe ünnerholln käönt.
„Dat du mi aower nich so väl dumm Tüg schnacks“, will Oma so‘n bäten vörsorgen. „Wat du doch immer häss“, knurrt dei. „Jao, ick kenn di!“ Opa schüddelt mit´n Kopp: „Gaoh wieter..!“
„Oh, dor sünd gi jo“, kummp Erna ehr all toumäute, „vandaoge ät wi buuten. Sett‘t jou dor man gau in´n Gorn an‘n Dischk, dat gaiht glieks fors los.“
Oma lätt sick nich lange nödigen un sett‘t sick fors an denn Gorndischk: „O fein is dat hier, hier kann man dat wull utholln.“
Opa kick noch‘n bäten üm sick tou und schüddelt mit‘n Kopp: „Wat hätt sick dat aal verännert, fräuher wör dei Herd van binnen un dei Lokus buuten. Vandaoge is dat ümgekehrt..!“
„Aower is dat nich schön“, sägg Erna, „hier kanns doch schön chillen.“
Oma kick ehr gans fraogend an:„Jao?“, fraogt sei nao, „wi menns du dat? Schulln wi – schulln wi noch‘n poor Tübbeken schillen?“
„Nä-nä“, lacht Erna luut up, „ick menn chillen, affhangen un so…“
Nu rischket Opa sick: „Verstaoh ick dat richdig. Affhangen, säggs du. Brucks du noch Fleischk för dien Kaoker? Wi häbbt noch wat in us Rökerkaomern hangen. Wat schall‘t denn wän?“
„Neeee“, Erna wedd all‘n bäten rappelig, „mien Felix bring aals mit, wat wi bruukt. Hei hätt mit all‘ne Mail schickt!“
Dat häff Oma hört: “Jao? – Mähl häss du krägen. Dat is gout, dann kunn ick, wenn gi willt, noch drokke‘n Kouken backen.“ Erna: „Och Oma..“
Dann kummp Felix, Ernas Freund, ümme Ecke, Hoore hoch schorn, schwattet Tüg un äöwerall Ringe…
Opa kann‘t nich laoten un mennt: „Erna, wo häss denn dann funn‘n? Hannelt dei mit Oltiesen ? Denn draffs aower bi‘t Gewitter nich nao buuten schicken. Dor treckt dei Blitz nao. Hihihi.“
Oma stuukt Opa inne Rippen: „Nu hollt doch den Mund. Du kanns et doch einfach nich laoten, ’n Aohnsägel bisse!“
„Sägel?“, Felix, Ernas Freund, krigg grote Oogen, „wat heit dat, ein Boot? Häss du‘n Schipp, Opa?“
„Wat‘n Schipp?“, prustet Opa rut, „nä“, un hei kick schräg nao Oma räower, „nä – ick häbb´n, ick häbb blots‘n ollen Damper..!“
Oha – dei Blick van Oma – dor brennt wat an…
Jetzt kummp Frieda, dei Lüttkeste, mit‘n Jungen ut‘n Huuse. Opa kratzt sick so‘n bäten verlägen an‘n Kopp un denkt luut: „Sowat hätt‘t fräuher uck noch nich gäben, Freien mit Äöwernachtung“, brummt hei.
Oma kick üm schräg an: „Wenn ick so trügge denk. Du wullst uck nie nao Huus. Un wenn ick aals toulaoten har, dann..?“
Opa kott aff: „Dann wörst du vandaoge all Urgoßoma!“
Frieda is pausenlos an gähnen. „Is wull‘n bäten laode worn“, mennt Oma, „fräuher geewt dat nich. Wi sünd mit dei Häuhner nao‘n Bedde gaohn!“
Frieda grinst Oma an un fraogt gans spitz: „Na – un wi biss du dann uppe Stangen kaom‘n?“
Opa schüddelt woller mit´n Kopp: „Oh, oh – wat häbbt gi junge Lüe doch för‘n Muulwark. Dat wör fräuher doch änners. Dor hülln sick dei jungen Lüe noch‘n bäten trügge. Un dei Wichter wüdden noch rot, wenn man se ansprök..“
Markus – Friedas Freund, kick Opa schräg an un grinst: „Ja, wer weit, wat du dei för‘n Schwienkraom vertelld häss…“ Puuh..!
Frieda wedd dei neischkierige Fraogerei touväl. „Häss du nich all buld wat fardig?“, röpp sei nao Erna raower.
„Jao – isset, nähmt jou man all‘n Teller, dat eierste Fleischk is muts fardig.“
„Braoet aower gout dör, sons kann ick’t nich bieten”, mennt Oma, „du weiss jo, wi sünd all‘n bäten öller!“
„Dann dou mi dat Stück man“, lacht Opa, „ick feuhl mi noch nich so old. Old is man eiers, wenn kein‘n Pudding mehr bieten kanns. Ick kann noch aals bieten, ick kann mi sogor in‘n Mors bieten..!“
Erna maokt grote Oogen: „Wat mennt hei dor dann woller mit?“
Nu lacht Oma luut ut: „Ja Kind, dat sünd Opas Schnäcke. Sägget wi so: Opas Tähn‘n sünd wie Sterne, nachts kaomt se rut!“ Erna gaiht koppschüddelnd.
Aower dat gaiht Grillen gaiht wieter – wedd noch richtig lustig! Vertell ick nächsden Sönndag…