KW 12/26 – Dummheit und Stolz… Off sülwes rinlegg! Jach – wenn man dat Praohlen nich laoten kann..
Gertrud, Harms Jan siene Frou, hätt dei Naoberfrauen toun Kaffee inlaoen. Dei wüssen aower genau, dat sei maol woller mit ehr Reisen grot angäben wull.
Gertrud leggde uck fors los un bepraohlde ehrn Urlaub in Itaolien un wo se äöwerall wän wörn: „Gi wörn doch mit Auto, sünd gi denn aowern Gotthard fäuhert?“, frög Köttken Marie. „Jao’n Kaoter häbbt wi aowerjaogd“, stäöterde Gertrud, „aower off dei Gotthard heitde, weit ick nich…“
„Un wu wör’t in Rom“, frög Marie wieter, „wat hollste denn van dei Sixtinischen Kapelle?“ Gertrud: „Dei – och jao, dei häff gout spält…“
Köttken Marie präökeld wieter: „Gi sünd doch lessde Wäken in Hamburg wän, häbbt gi jou Jüngste besöcht. Wat is dei eigentlich worn?“ Getrud rischke sick un sä gans stolt: „Eine Künstlerlin..!“ „Jao? – wat maokt sei denn?“, frög Marie wieter.
„Dat weit ick uck nich so genau. Wie häbbt ehr lessdens besöcht. Sei möss wat vördrägen. Dei Lüe wörn van ehr gans begeistert, dei häbbt us mit Bloum’n beschmäten…“
„Jao – dat wör bestimmt schön?“ „Nä, dat häff kolln, anne Bloum’n wörn dei Pötte noch anne!“
Pastors Liese will bäten wat Goues toubi drägen: „Wat harn gi dor gistern dann för‘ne grote Fier bi jou uppe Terrasse. Gi wörn ja aal düchtig an danzen?“ Gertrud: „Von wegen danzen – mien Kerl köm besaopen in un hätt dei ganzen Immenkörwe ümmeschmäten..!
So kummp dat, wenn man dat Praohlen nich laoten kann!