KW 15-16/26 – Osterküken…
Ostern is wull vörbi. Aower ick mott noch äben vertelln, wi dat fräuher bi usen Naober mit denn Osterhaosen löp:
Eier van freilaufende Hühner sünd vandaoge wat Besünneret. Bi usen Naober wörn fräuher dei Häuhner immer buuten, äöwerall up’n Hoff. Inne Büschke achter ehrn Häuhnerstall harn Harms Kinner dit Johr uck ehre Osterester baut.
Ostermorgen güng dat mit Hallo naotoukieken, off dei Osterhaose dor wän wör un wat brocht har. Ohje, wat wör dat, wat seeten dor up ehre Ester? So richdig dicke bruune Häuhner! Wat wör passiert? Dor wörn jüss poor Häuhner an klucken (brüten) wän un harn dor inne Büschke äbenfalls ehre Ester. Nu mäöt dei Ester vanne Kinner ehr wull bäter gefalln häbben un deswägen wörn se “ümmetrucken”.
Bit eierste Est keeken dor poor Eier ünner weg. “Gaoh dor weg, dat is mien Est”, sä dei lüttke Jan un wull nao dei Eier griepen. Zack – dor har dat Hauhn üm all bäten.
“Kiek maol, bi mi kick dor’n lüttket Küken ünner weg”, röp Marie. Un Korl, dei Lüttkeste, füng an tou schrein, weil in sien Est ein Hauhn seet un fiew Küken ümtou lööpen.”
“Wat is dat denn?”, Opa wör mitkaom’n, “hätt dei Osterhaose Küken brocht? Sowat hätt et doch noch nie gäben.” “Opaaa”, Bernd, ein van dei öllerei Jungs, aohnde wull, dat hei dor aowerute wän wör, “wo sünd dei Ester, wo häss du dei Eier laoten?” “Kiene Angst”, Opa keek gans listig ut, “nix passeiert, dei häbb ick bi Huus in jou Ester legg.”
Woller bi Huus kömen dei Naoberkinner all an. “Hätt jou dei Osterhaose nix brocht”, frögen dei fors.” “Jao,Küken!” schnaude dei lüttke Korl bisiet, „aower wi bruukt denn Osterhaosen nich mehr. Us Opa legg sülwes Eier!”