Allgemein - Döänkes van Batkes Jupp

Allgemein

Unkel August is för Nachhaltigkeit…

Posted on 28. März 202629. März 2026

KW 14/26 – Unkel August läwt g’sund un is för Nachhaltigkeit...

Bi us in Café geew et interessante Gäste. Einer dorvan wör “Unkel August”. So räden üm aal Lüe an. Wi hei wücklich heitde, weit ich nich. Aower wenn hei köm, geew et immer masse Spaoss. Lüe wat uptoubinn’n mök hei am leiwsten.

Unkel August wör ein besünnern Typ, Eigenpeiter säggman wull. Van wat Neien hüllt hei nix, aals neimeutschken Kraom, sä hei immer. Hei sülwes wör ein Tüftler, baude manchmaol wat tousaome, wat man gornich för möglich hollde.

So wör dat uck mit E-Bike, Pedelec un so’n Kraom. “Is aals tou düer, dat kann ick bäter”, wör sien Schnack. Wat mök hei? Hei har in sien Schoppen noch ein gans ollet Rad mit ein lüttken Motor, “Hilfsmotor” off “Maria Hilf” sä man fräuher dortou. Denn har hei woller flott krägen. Dat Problem wör, dat dei olle Tweitakter nich bloß furchtbor knatterde, sünnern uck heller qualmde. “Bliew dor mit wäge”, heitde dat immer.

Aower Unkel August wüdd sick tou hölpen. Hei baude sien Schiddiwat ümme, mit Gasantrieb?!”, so sä hei. “Aower Gas is doch genauso düer”, heitde dat fors, as hei dor mit anköm. “Nee nee, dat is Biogas”, mennde Unkel August, “ick vertell jou dat”, un dachde bi sick, nu wick ehr so richdig ein upbinn’n.

“Gi willt doch aal so modern wän, „gesund und umweltbewußt” läben”, mennde hei, “ick gaoh uck midde Tied. Ick ät väl Fisch un Gemüse, nähm – weil et einfacher is, dann ‘nen Rollmops, dor is dat Gemüse all drin.

Ick bin uck för Nachhaltigkeit, ät imer Fischbrötchen mit väl Ziepeln. Dei sünd sehr nachhaltig, un ick kann mit mien Eigenandeil an Biogas uck noch billiger fäuhern!”

Wer’t nich verstaohn hätt, kann ick bloß noch Unkel August nachhaltige Maohltied empfählen…

Allgemein

Dei klaut wi dei Raoben – Hochkunjunktur für Kleptomane!

Posted on 25. Januar 202625. Januar 2026

KW 4/26 – Hochkunjunktur für Kleptomane! Dei klaut wi dei Raoben…

Dat kenn gi uck: Ein- off tweimaol inne Wäken giff dat Sünnerangebote in Supermarkt, Wat werd dor aal för Saoken anbaoen, wat giff dat dor aal tou seihn. Uck ick kiek mi dat jümmers gern an, wenn mine Frou dor an inkoopen is.

Wenn ick dann aower seih, wi van dreiste Froulüe, oft‘ne sog.“schwatte Kolonne“ dei inpackten Woren ut’nänner räten un bisiet schmäten werd, un wi dei Dischke dann utseiht, is mi dei Lust doran vergaohn. Wat denkt dei sick ellinck dorbi? Sowat wör us all as Kinner verbaoen un dat gilt för mi uck vandaoge noch!

Einmaol häbb ick mi doräöwer maol mit eine Verkäuferin ünnerholln. Dei zuckde blots midde Schullern un sä: „Dat isset noch nich. Wat menns wull, wat hier aal klaut wedd..!
Schlimm – nich? Wenn ick et uck nich ännern kann, so fallt mi doch dortou’ne lustige G’schichte van fräuher in. Villich schull man dat vandaoge uck noch utprobeiern:

Bruns Bennard wör all‘n poor Daoge alleine bi Huus. Siene Liese wör in Kur, har üm aower gout toulehrt, so dat hei sick wull hölpen kunn. Nu harn sei‘ne Naoberschke, dei üm mit ehre Schnackerei nervde. Un dei har uck noch leipe Täöge – Bennard sä d‘ Klemtomanie tou!

Dei Rege nao: Et wör fräuher Moude, dat man ’n bäten Kleingeld „bi dei Hand har“ – för‘t Sammeln, Zeitungsgeld unsowieter. Dat Geld wohrde man oft baoben up Schapp inne Käöken up. So mök Bennard dat uck.

Nu har hei all´n poormaol mennt, dat dor Geld fählde. Wi kunn dat? Wör dat villich dei Naoberschke? Dat krigg ick rut dachde hei, ick teik dat Geld.

Nächsden Dag frög hei ehr, off sei üm wull Geld wesseln kunn – un richdig un gout, sei har dat teikde Geld. Wat mök Bennard: Sä nix, un stellde dor´ne Muusfalln hen!

As siene Naoberschke maol woller köm, güng hei toufällig nao näbenan. Dat düerde uck nich lange – dor köm ein Gebrüll ute Käöken, as wenn dor einer inne Fallen seet – un so wör´t uck.

Hei sehg noch jüss, wi dei Klemtomane wi dei Blitz rut suusde. Un wat dachde Bennard: Hölpt am bessen..!

Allgemein