21.10.26
As grote Foutballfan dou ick aals läsen, wat dor äöwer schräben wedd. Dor kriggs dann uck mit, obwohl man et gornich wäten will, wi dor mit Geld „rümmeschmäten“ wedd.
Wenn ick trügge denk, dor harn uck dei Späler innne höchsten Liga näbenbi ehr Inkaomen, off Versicherungen, Zeitungslaoden, Lotto-Toto-Kiosk usw. Sogor ein Uwe Seeler möss näbenbi noch sien Brot as Vertreter verdeinen. Un vandaoge. Dat gaiht von… bit… -, ick weit nich, wo ick anfangen un uphörn kann.
Dei Zaohlen sünd as „Normalbürger“ sowieso nich tou begriepen. Datt man äöwerhaupt ein Mensch koopen kann, hört sick all wi inne Sklaoventied an. Un wi kann, üm maol ein Beispill tou wiesen, ein Späler in Brämen 2 Miilionen un in München 100 Millionen kosten, obwohl beide Späler doch dat Süfftige maokt – Foutball spälen?
Dann mags am leiwsten kien Foutball mehr seihn. Aower man kummp dor nich an vörbi. Vandaoge is mi ein wieterer Vergliek upfalln. Dor is dei Späler, CR7 nennt hei sick, tou’ne Geldstraofe van 255 Euro verurdeielt worn, weil hei siene Arbeit verwegert hätt kiene Lust mehr har, un einfach wegloopen is.
Wenn man dat in Vergliek tou ähnlicken Fällen sütt, möss et dorför ein Straofe van drei Monatsgehälter gäben. Un dorut sünd et 255 Euro worn? „Dann wör dat jo ein“ armen Blout!“, har mien Opa sägg.
Wenn man dann hört, dat disse Späler up’n Dag poor Dusende, poor Taihndusende Euros, off noch mehr veideint – verdeint bistimmt nich – aower krigg, dann denk ick… ick sägget nich.
Dann denk ick leiwer an Jan, denn Wandergesellen. Hei möss vör Gericht, weil hei klaut har. „Kann ick“, har hei denn Richter fraogt, „wenn ick dei Straofe affsäten häbb, dei Böxen ümmetuschken?. Dei wör twei Nummern tou grot!