Kategorie: Wo heitde dei noch

Dei Breif an’n Kaplaon… KW 7/26

Vandaoge häbb ick us ollet Familienalbum dörbloort. Dor hätt Tant Marie näben Biller uck lüttke G’schichten mit affheftet. Eine hätt mi et besünners andaon. Et hannelt sick üm ein Kaplaon,  dei in ein ännert Dörp versett’t wern schull un dor eine Hushöllerschke söcht har. Finao ut dat Dörp möss dat wull hört häbben un har üm dissen Breif schräben:

Ährwürdiger Herr Kaplan,

wie meine Freundin Marie mich schreibt, werden sie verschickt un müssen ein eigene Hushöllung anfangen. Was Marie mich da vorschlägt, gefällt mich gut, nämlich bei ihnen Hushöllerschke zu werden.
Das würde mich gerade jetzt gut passen, da meine Schwiegerin, ein schlimmes Biest, mein Leben gans suur macht.
Auch die Blagen sind gor nicht nett zu mich, wie sich das gegen eine Tante gehört. Sie sagen immer, ick hätte keinen mitgekriegt un davon wäre ick ekelig.
Das stimmt aower nich, denn ick habe immer herumgerüngelt un mich, toun Beispiel bi Hein‘s Lui gans oft hengekrägelt, un er hat doch nicht angebissen.
Letztens sagte so ein Rotzlöffel sogar zu mich, ick täte auch die Gewitters machen. Sowiet is das schon gekommen.
Ick bin im gouen Alter, na eben so umme Füfftig herum. Das paßt ja auch ganz gut, weil sie ja noch ganz jung un nich erfahren sünd. Ick habe auch keine Bekanntschaften und will von den Mannslüe nix mehr wissen.
In all den Arbeiten bin ick perfäkt. Ick kann ganz gut kochen, am besten Arfkensoppen mit Schwienepöötges un – steert.
Nun weiß ick nicht, wo sie hinkommen. Im Goorn bin ick gut. Aalen (=jauchen) tu ick selber. Wir könnten eine Kauh halten. Mölken kann ick auch gut.  Dann hätten wir auch die Kaffemölk umsüss.
Hühner wollen wir aber auch halten. So selbstgelegte Eier sind immer frisch un nich so teuer. Ick tue ja auch gans sparsam wirtschaften. Sollen wir uns auch nicht ein Schwienken halten? Da konnte ick immer besonders gut mit umgehen.
Ick täte ihnen auch gut was mitbringen für den Huushalt. Ick habe noch gutes Potschelaon von meine Oma. Dann habe ick auch noch manch Rullen Linnen, die ick mir für alle Fälle mal angeschafft habe. Aber leider bin ick ja Jungfrau geblieben. Un, dormit ick dat nich vergesse, ick habe für die Utstüür uck noch 24 Laken für uns.

Nun bitte ick ihnen, tun sie Ihre Backbeern man ruhig mit miene zusammenschmeißen. Es soll ihnen auch nich gereuen. Ick kann alles, wat sie nun auch wohl wollen:  das Grobe un uck das Feine.
Ick erwarte ihnen stündlich zu besichtigen!

Na – wenn dat kiene Bewerbung is… Pack man fors tou!

KW 6/26  … Van’t  Hieraoten in fräuheren Tieden…

IValentinsdag – ein wichtige Dag för alle, dei sick mäögd. Fräuher geew et sowat nich, vertellde mi Tant Libett, fräuher mössde man naohhölpen, dat dei Wichter an’n Kerl köm’n. Off dat aal so loopen is, wi sei mi dat vertelld hätt, weit ick nich. Aower ick gäw dat maol so wieter…

Dochter: Oooh, ooh- wat is dat doch’n Mallör, ooh, ooh- wat häbb ick dat uck leip!
Mamme: Wat häss  tou plärren, wo häbbse di denn all woller bäten?
Dochter: Oh Mamme – ick häff doch so’n Kummer…
Mamme: Wat säggs du dor, du häss Kummer, up Enne uck noch Liebeskummer, off so wat?
Dochter: Jao Mamme, dat isset jo. Du säggs genau wi use Pappe, dat ick denn Hinnerk hieraoten schall, aower ick mag denn doch gornich!
Mamme: Wich, nu sägg mi doch maol, wat häss du dann an denn ollen  uttousetten?
Dochter: Och Mamme, dei is doch väl tou old för mi…
Mamme: Tou old, ick mag et nich hörn. Dann gaiht hei doch uck eiher dot un du häss Ruhe up’n ollen Dag…
Dochter:  Aower, dann hätt hei uck noch so grote Fäute…
Mamme: Grote Fäute, dat is doch gout, wenne up’n groten Faut läwen kanns..
Dochter: Un häss dat all seihn, dei häff dat ganse G’sicht vuller Sommersprossen – öwerall…
Mamme: Kiek an, Sommersprossen häff dei, dat passt doch gout tou üm – dei hört dortou, wie dei Pann’n up Dack!
Dochter: Un dann wieter, dei is doch so däösig, dei is inne Schoul all twei Johr sittenbläben.
Mamme: Wicht – dat maokt doch nix. Denk doran: Dei dümmsten Buurn häbbt jümmers dei dicksten Tübbeken..!
Dochter: Aower häss denn all richtig ankäken, dei groten Ohrn, so saurichtige Schwienlappens…
Mamme: Maokt nix, dann hörde die uck bäter, bruuks nich so tou larmen…
Dochter: Aower dat maokt üm so häßlich un dann noch dei langen Näsen. Hei hätt doch so’n richtige rode Räuben in’t G’sicht…
Mamme: Kladderadatsch, Daomelei. Wicht, glöw mi, Schönheit vergaiht..!
Dochter: Un wie löpp hei rümme. Jümmers ‘n Draopen ünnere Näsen.
Mamme:  Un? Dat is doch’n Teiken, dat hei noch nich verdrögt is…
Dochter:  Uck krumme Beine häff hei. Dor kann use Mudde dör…
Mamme: Dor kanns nix van seihn, Dor treckt man’ne Büx aower.
Dochter:  Och Mamme, weisse – ick mag denn einfach nich liern!
Mamme: Dummet Blaog, dat heit öwerhaupt nix – denks du villich, ick häff dien Pappen liern mög.?

Schäuler, Köster, Öllern…
Dei lüttke Heini wör´n gansen Schlauen: „Mien Papp´n will mi füfftig Mark gäben, wenn ick´n gout Tügnis krieg.“  „Dann streng di an“, sä dei Lehrer. „Ick weit wat Bäteres“, sä Heini, „schriew mi ein gouet, un wi deielt us dat Geld.“
Ick weit, wo hei waohnt…  Fiddi  kummp mit´n leip Tügnis nao Huus. „So ein Tügnis is doch glatt´ne Tracht Prügel wert“, mennde sien Papp`n.„Menn ick uck“, sä Fiddi, „laot us forts hengaohn. Ick weit, wo dei Lehrer waohnt..!“

KW 2/26 – Wat dör dei Bloumen säggen…
Wenn man wat direkt nich säggen will, off dütlicker utdrücken will!
-Vandaoge is dei Hund dran!

-Bi dit Weer kanns kien Hund nao buuten jaogen = Sauwetter – kannst nich mal den Hund rauslassen!
-Kummps aowern Hund, dann kummps uck aowern Steert = Hast du den Berg erklommen, schaffst du auch wieder runter!
-Wenn‘ n Hund schmieten wull, find’s uck’n Stein = Wer einem was unterstellen will, findet auch’nen Grund!“
-Wenn – wenn dei Hund nich schäten har, dann har’n Haosen gräpen = Wenn das ?  nich dazwischen gekommen wär – dann..!
-Gaoht vör’e Hünn’n = gaiht kaputt; geht zu Ende, wird‘ne Katastrophe!
-Dor wedd dei Hund inne Pann’n verrückt = is doch nich normaol, ist total verrück!
-Dor is dei Hund begraoben -? dor is gornix los; ist überhaupt nichs los!
-Schulden, as’n  Hund Flöhe = sehr viele unübersehbare Schulden!
-Up’n Hund kaom’n = pleite, schlechte Wahl getroffen!
-Dor weiht dei Stert mit’n Hund = verkehrte Welt, da läuft es anders herum!
-Wo dei Hund ’n Pott find, steckde seine Schnuten rin = Neugier lockt, steht die Tür offen, will man auch reingehen!
-Bäter ein’n dullen Hund straoken, as’ne Frou tou säggen, dat se graue Hoor krägen hätt… = Nicht die Finger verbrennen!

Dei Hund lügg… Tante Mine möss för Fiddi siene Täöge immer herhollen. Sei wör maol woller tou Beseuk, un Fiddi leggde fors los: „Weiß du all, Tant Mine,dat use Hund lügg“, sä hei . „Dei Hund lügg, wo giff’t denn sowat?“, frög dei trügge. „Kann ick di bewiesen“, sä  hei – un gans luut tou den Hund: „Wie spräkk  dei Katt?“ „Wau“, geew dei Hund woller trügge. „Siehste“, sä Fiddi, „dei Hund lügg!“  

Glück sängs Neijohr tweidusendunsessuntwintig..

Glück sängs Nei Johr 2026

…Wenn dat olle Johr gout wör, frai di up´t neie; wör`t dat nich, dann eiers recht…

…Vergäten käönen heit, mit dei Erinnerungen doran in Fräe tou läben…

…Man kummp bäter dör’t Läben, wenn dat Hart ‘n bäten weiker is as dei Kopp…

…Dat giff soväl goue Vorsätze. Man bruukt se bloos noch ümsetten…

…Schuuf nich aals up morgen, denn wenn di dat Spaoß maokt, kanns et morgen jo woller doun…

…Klouke Menschen maokt nich aale Fähler sülwes. Sei gäwt uck ännere dei Chance dortou…

…Undankbor is deijenige, dei wat för`t Nixdoun krägen hätt un för dei süfftigen Bedingungen mehr häbben will…

…Dat Benähmen is`n Speegel, wie`t van innen utsütt…

…Man schall nich den Mund tou vull nähmen – bi`t Räden un bi`t Äten. Dat bewohrt ein`n vör Arger un  Gewicht…

…Sick sülwes tou bekriegen, is oft dat Schwörste. Sick sülwes tou besiegen, dat Allerschönste…

Un statt tou klaogen, dat wi nich aals häbbt, wat wi wullen, schulln wi leiwer dankbor wän, dat wi nich aals krägen häbbt, wat wi verdeint harn…

KW 49/25 – Oma un dei Arfkensoppen…

Disse G’schichte kenn ick all ut miene Jugendtied. Ein Dauerbrenner. Kann man för jede Johrestied tourecht maoken. Schall hölpen, Vörurdeile afftoubaun!

Dei Dag vergaiht, Tied rennt – rutz sünn wi woller – in Advent!
Oma inehr lüttke Kammer, denkt – dor nutzt kien Gejammer, ick fang wat an, bin´t klaogen satt – ick fäuher nu mit dei Baohn in dei Stadt.
So turnt sei los, nao dei Grotstadt hen – Wiehnachtsmarkt sitt ehr in Sinn. Vör den Bedriew is sei nich bang – dat bekick sei  stünnenlang.
In ein Koophus will sei dann wat äten – ehr knurrt dei Maogen all so’n bäten. Sei schlutt sick in dei Rege in – köff’n Arfkensopp‘ mit’n Bockwusst drin. Mit ehr Sopp, noch heit un frisch – sett´t Oma sick an’n nächsden Dischk.
Mit Bockwusst is dat nu jo so – dor hört uck’n bäten Mostrich (Senf) tou. An Tresen staiht dei Mostrichpott – Oma haolt sick’n gouen Dutt. Aower as sei trückkump, gor nich lang – is einer bi ehre Sopp‘ tougang. Ein Farbigen isset, wer weit woher –  läöpelt Omas Teller leer, ganz genüßlich un in Ruh un Oma kick üm sinnig tou.
Denn sei mennt, as Daom von Welt – dei arme Kerl hätt wiß kien Geld, un sicher Hunger all siet Daogen – doch uck ehr knurrt bös dei Maogen.
Sei gaiht an’n Disch langsaom ran, un schielt denn Teller immer an, un schwupp-di-wupp, mit flinker Hand, treckt sei sick dei Wusst an Land.  Mostrich hätt sei gans vergäten – blots ein-twei-drei, dei Wusst upäten.
Dann schielt sei räöwer nao den Mann – lacht üm nett un fröndlich an. Uck dei lacht Oma fröndlich tou – un läöpelt wieter, ganz in Ruh.
Un as dei Teller blitzblank leer – haolt hei noch schnell  twei Glas Beer. Ein Glas drinkt hei, un dat, wat äöwer – schuff hei lies nao Oma  räöwer. Oma straohlt us is ganz baff – dei Mann aower lacht und gaiht dann aff.
Oma denkt noch dit un dat – un feuhelt sick gornich richdig satt. Noch eine Soppen will sei sick haolen – un söch Lüttgeld, üm tou betaohlen. Doch – du leiwe Tied, dei Schreck is grot – nu sitt Oma bös in Not,
sei stukert dullken inne Hoor- ehre Handtaschk, dei is nich mehr dor…
Sei kick sick ümme, maokt sick rischk – dor hang doch ehr Taschk an’n Näbendischk. Ehr Arfkensopp´, dat is wohr – mit dei Bockwusst drin- staiht uck noch dor!

Un wat lehrt us disse G’schicht?  Dat wat man schnell mennt, dat stimmt oft nich, man mott uck änner Menschken troun – un jüm nich glieks dei Bockwusst klaun..!

28.11.2025(KW 48) – Us Harras un dei Wiehnachtsmann…

Eine G’schichte ute achziger Johrn, dei ick domaols för miene Dochter för eine Lesewettbewerb inne Schoule up Platt tousaome stellt häbb…

Dat wör inne Adventstied, kott vör Wiehnachten. Wie harn jüss ein neien Hund krägen. Dei heitde Harras un wör’n gansen Resoluten. Aower sien eiersden Wiehnachten häbb ick nich vergäten. Dat laot ick nu maol üm sülwes vertelln…

„Nu bün ick all’ne ganse Tiedlang hier, aower wat ick vandaoge beläwt häbb – ick weit nich mehr, wat ick noch richtig maok. Dorbi füng dei Dag gout an. Alle wör’n se fräuh uppe. Ick häff mi richtig frait. Jeden häbb ick fründlick anbläkt. Alle häbbt se mi straokt un wörn gout toufreer. Aower nao’t Fräuhstück güng’t los. Dunn renn’n sei aal dörnanner. Dei ganse Waohnung wüdd ümmerüümt. Jeden, denn ick toumeute löp, jaogde mi bisiet.

Nömmdaogs köm se mit so’n greunen Boom an. Ick häbb mi eiers richdig frait, dachde doch, dei wör för mi. Ick wull jüss dat Bein hochhollen un – dor fauchden sei los: Laot dat, du Schleif van Hund. Wat häbb ick mi verjaogd…

Un wat mäöken sei  dunn? Sei schläpen denn Boom doch glatt in’t Huus un inne Staomt. Un noch  schlimmer, aale güngen sei bi un hüngen dor so‘n glitzeliggen  Kraom an un straohlen dorbi ümme Wette. Tiedlang häbb ick mi dat ankäken, dunn bün’ck d‘ henstaoben, denn – dor will ick uck mitmaoken, mit so’n Boom weit ick jo uck wat antoufangen. Jüss wull ick mien Bein hochhollen: Wat för’n Geschrei! Wat häbbt dei mi anbölkt – ick mag nich säggen, wat ick tou hörn krägen häbb. Ick bin nur noch schliepsterts in mien Korf kraopen un häbb mi nich mehr rögt…

Nao’n poor Stünnen möss ick maol nao buuten. Dat wör all düster worn un ick wull jüss ümme Ecke, dunn – wat is dat? Wer schleicht dor dann rümme? Wi sütt dei denn ut – so’n langen roen Mannel anne, up‘n Kopp so’ne komische Müssen, langen Bort un uck noch so’n Rucksack uppe Nacken…

Dei will bestimmt bi us inbräken un klaun! Dor mott ick hen! Vör sowat bün ick jo schließlick dor. Denn wick dat wiesen. Dann sünd use bestimmt woller nett tou mi, weil ick so fein uppasst häbb…

Luut bläkend stöw ick d’hen. Doch wat mök hei? Hei haude nich aff, hei drückde doch glatt bi us uppe Klingel. Is dei dann vör nix nich bange? Nu is’t egaol! Ick wull’n jüss bi’t Schlawittken packen, dor güng dei Dörnt aopen un – use schülln  woller  m i ut..! Nä, nu reicht‘, dunn bin’ck in’t Nest gaohn un nich woller upstaohn…

Och jao – dei Olle is aobens noch ankaomen, häff mi’ne grote Wusst un’n Stütken mitbraokt un sägg: Kanns jo uck nich wäten… Nu bün ick woller toufräe!“

23.11.2025(KW 47  –  Man schall sick nich verseihn…

Ein Ehepoor fäuhert toun Inkoopen nao‘n Supermarkt. Ünnerwängs is all „leipe Luft“, d. h. sei sünd nur an käbbeln. Dat wedd immer mehr, so dat dei Kerl gornich mehr mit in den Markt will. „Maok du dat man alleine“, sägg hei, „aower dat dat nich woller solange düert.“

Nu eis recht, denkt sei un tüdelt bi jeden Verkoopstand noch länger herümme. Aower – wi dat so will, dat löpp änners. Off sei nu gistern aobend touväl Suurkohl äten häff – villich dei Uprägung van vörhin dortou – in ehrn Buuk fang dat richtig an tou grummeln. Nützt nix, denkt sei, man hen nao dei Kasse. Oh Gott, dor staiht dat bit baoben vull. Un dei Luft in ehrn Buuk drückt immer doller.

Endlick anne Rege. Dei Saoken up Band, betaohlen, rin inne Taschken, schnell rut un rin in‘t Auto… Puuuh -Rumms – dat giff Luft – uck eine Frou kann maol richdig pupsen! „Dat har nich mehr lange düern dröff“, sägg sei tou ehrn Kerl, kick biesiete un – dor sitt ein gans ännern…

Blots noch rut – ehr Auto staiht doch up dei ännere Siet. Sei schmitt sick up‘n Näbensitz: „Schnell weg, fäuher los“, sägg sei gans upgerägd. „Wat is denn los?“, fraogt ehr Kerl ünnerwängs. Sei vertelld üm dat. „Is doch egaol“ , sägg hei, „hier inne Stadt süss denn doch nich woller!“

Sei sünd woller bi Huus. Ein lüttke Viddelstünn‘ läöter klingelt dat anne Dör. Wer staiht dorvör? Dei Kerl van dat  ännere Auto: „Ick wull blots jou Handtaschk bringen, dei bi mi noch in Auto stünd..!“

Marie, Maogd up Brows Haowe, mäög doch denn Jan so gern liern. Wenn dor Gelägenheit tou wör, vesöchde sei üm so´n bäten antoumaoken. Eines Daoges kreeg sei üm bi´t Inricken vanne Weide toupacken.
Fraidig pück sei um ümme un straohlde: „Och is dat schön. Ick weit nich, wi dat kann. Dat gaiht mi dör un dör.“ sä Marie.
„Aower ick weit dat wull“, sä Jan, „ du staihs mit’n Mors an’n Elektrozaun..!“