Kategorie: Wo heitde dei noch

31.08.2025/KW 36 – dat goue Hart...

Aal Johr woller: frait man sick uppe Karms. Uck fräuher. Wat wör dat schön, wenn wi use füfftig Pennig kreegen un us dorför ‘ne Lutschstangen off wat Seutes koopen kunn’n.

So wör’t uck bi us, bi Batkes – dat heit, dor geew us Opa nao dei Kinnermissen sogaor för siene Enkel wat ut. Dann bruukten wii dat Geld nich aal utgäben un kunn‘n d’ mit praohlen, dat wi noch wat woller mit trügge brocht harn.

Opa brüng uck immer wat för Oma mit, wenn dei wägen ehre leipen Fäute nich nao Karken henkaomen wör. Un dorbi is’n Hans ein lüttket Mallör passeiert.

Opa har för Oma ein grotet Hart köfft. Dat har hei ’n Hans ümmehangen – hei schull Oma dat gäben. Dat Hart wör för denn lüttken Däöts aower noch väl tou grot – et hüng üm buld bit uppe Kneie.

Ünnerwängs, sei mössen buld’n Stünnen gaohn, möss Hans maol ümme Ecke – „för lüttke Jungs“. Un dor is dat Mallör passeiert. Dat Hart, hei har et bisiete schaoben, rutschkede woller nao vörn un wüdd – klitschkenatt!

Oh Gott, wat nu, dachde hei un wör buld anfangen tou schrain. Opa har’t aower wull all seihn un sä fors:

„Maokt nix – is gornich schlimm. Oma kann nich mehr gout bieten und mott denn Kouken sowieso instippen..!“

Up‘n Schoulplatz häbbt sei sick mit Steine schmäten.
„Worüm häbbt gi denn trüggeschmäten un mi nich roopen“, fraogt dei Lehrer dei lüttken Jan.
Jan keek üm schräg an: „Menns denn, du hars dei bäter draopen?“

Urlaub up‘n Lanne…

Hubert will sick‘n Perd för‘t Riern utleihn‘n. „Wi lange kann ick dat beholln?“, frogt hei nao. „Dat is gans ünnerschiedlick“, mennt dei Buur, „dat aowerlaot wi immer dei Peer..!“

Jan hätt sick’n Zimmer up’n Buurnhoff söcht. Dei Buur bepraohlt dei Vördeile: „Bi us wäss schmorns van‘n Haohn weckt!“ Jan: „Gout  – dann stell denn Haohn man up säben Uhr..!“

> Wat ute Praxis: Dei Richter fraogt Jan: „Ick will jetzt wäten, wi old sei sünd. Wann häbbt gi Geburtsdag?“ „Worüm schall ick dat säggen“, sägg Jan, „gi dout mi doch nix schenken…“
>“Gefallt di‘t hier in Urlaub“, fraogt dei Kerl siene Frou. „Jao, bün spraoklos!“ „Gout“,mennd hei, „dann bliewe fors twei Wäken!“

Vertell eis maol…
Korl: Worüm wullt du di dann van diene Frou scheiden laoten?“
Jan: „Weil se jede Nacht dör dei Kneipen treckt!“
Korl: „Is sei Alkoholiker?“
Jan: „Nä, sei söch mi…“

< Disse Wäken bin ick bi dei „Kläönschnacker“ – up vörige Siet