Dei besünneren Utstattungen… KW 30
Us Naober hätt sick ein neiet Auto toulegg – ein Auto mit „allen Schikanen“ – sägg man wull. Stolt köm hei dor mit vörfäuhern. Natürlich häbb ick dat düchtig bepraohlt: „Is uck bestimmt düer wän“, sä ick touless, un „häss denn hier van den hiesigen Händler köff? Ick häbb so einen dor lessen in Schaufenster seihn. Junge Junge, dei is nich billig!“
Hei haolde deip Luft: „Jao, mags wull säggen. Aower wenn dat dei Pries wän wör… – aower dunn kömen aal dei sog. Aufpreise, ick sägge di’t!“.
„Dor weit ick wat“, sä ick, „villich kanns du dei uck maol wat verkoopen. Dann maoks dat wi Baohlen Bernd.“ Un dann häbb ick üm disse G’schichte vertelld:
„Baohlen Bernd har siene Buureie dichte bi Bräm’n. Sien Hoff har hei plietsch up’n Stand, un nu har hei sick uck ein neiet Auto köff. Dei Vertreter har üm uptelld, wat so’n Auto aal kunn, un Bernd har’t affnickt.
Hei wör annerförsick ein gansen Ruhigen, aower as dei Räknung köm mit aaö dei „Aufpreise für Sonderausstattung“, wüdd hei d’vergrellt bi.
Teuw eis, dachde hei bi sick, jou krigg ick uck bi d’ Büx. Rein toufällig har einer van dei hohen Herrn van dei Autofirma ’n lütt Anwäsen,’ne Hüereie, up’n Lanne un sick van üm’ne Kouh köff…
Also schreew hei uck so’n saftige Räknung:
Kuh – Standardausführung -Grundpreis…………………..4.000,– DM
-zweif. Ausführung (schwarzweiss) – Aufpreis……….. …..500,– DM
-Rindlederbezug……………………………………………….300,– DM
-Milchbehälter für Sommer- u. Winterbetrieb………………..200,– DM
-4 Zapfhähne zu je 50,– DM………………………………….. 200,– DM
-2 Stoßstangen, verhornt zu je 35,– DM……………………..100,– DM
-Fliegenwedel, halbautomatisch…………….. ……………….100,– DM
-Düngevorrichtung – BIO-Ausführung ………………………100,– DM
-Allwetterhufe, vierfach…………………………………………..100,– DM
-Zweikreisbremssystem (vorne und hinten)………………….800,– DM
-mehrstimmige Signaleinrichtung……………………………….200,– DM
-verschließbare Halogenaugen………………………… ……..300,– DM
-Vielstoff Futterverwerter …………………….. …………. …..2.500,– DM
= Totalkuh in gewünschter Ausführung………………..9.400,– DM
* Zahlbar ohne Nachlass ! ! !