So moss dat maoken… KW 35
Dei Kellner ünnerhollt sick: „Worüm läss du denn Kerl an dien Dischk dor besaopen herümmehangen? Schmiet üm doch rut.“
„Nä, nä – gornich schlimm, denn jedsmaol wenn hei wach wedd, dait hei van neien betaolen. Glieks wekk ick üm dat drütte Maol…“
Hätt nich klappt… Pastor wull dei Lüe bäten anrögen un leggde ein Hunderter in denn Klingelbühl/denn Opferkorf. Naoher frög hei’n Köster, dei mit denn Korf rundgaohn wör, off dat wat brocht har. „Ja“, sä dei, „ick mösse dauernd up‘n Finger kloppen, dormit ick denn Schien behollen kunn…“
Dei häff dat all seihn: Up Majorka draopt sick twei olle Schoulkollegen. „Na“, sägg dei eine, „biss du uck noch an studeiern? Maoks villich‘ne Studienreise?“ „Nä, ick bin up Hochtiedsreise.“ „Un wo häss diene Frou?“ „Dei is bi Huus bläben. Sei har dat hier aal all seihn..!“
Gans ingebildet: Sefas Süster Lisa kummp ut‘n Urlaub trügge un praohlt ehr wat vör: „Ach wör dat schön. Du glöws gornich, wi ick ümschwärmt wüdd.“ Mennde Sefa: „Ja, ick häbbet uck hört, dat dor‘ne Mückenplaoge wör..!“
Teppich kloppen… Naoberschke: „Worüm schellst du dien Kerl bi´t Teppichkloppen immer ut?“ „Dann wedd hei dull un kloppt bäter!..“
So spält dat Läben…
Oma wedd ut‘n brennendet Huus haolt. Dei Füerwehr hölpt ehr uppe Lettern. „Jetzt moss dei Tähn‘n bäten tousaom bieten“, mennt ein Füerwehrmann. „Oh Gott“, sägg Oma, „dann man woller trügge, mien Tähn‘n leegt noch uppe Kommoude..!“
Wat för´n Äsel: Lisa vertellde Tant Mia van ehre Hochtiedsreise. „In Mexiko häbbt wi‘ne Äselstour maokt. As wi jüss up‘n Barg körn‘n, wüdd dei Äsel störrisch un hätt mi rünnerschmäten.“ Tant Mia kick grot: „Dann har‘ck mi fors woller scheiden laoten..!“
Wat gans Besünneres… Dei Schandarm tou denn nich anmellten Straotenmusiker: „Das geht nicht. Jetzt müssen sie mich begleiten.“ „Oh fein“, sägg dei, „wat willt wi denn spälen?“
Hinnerk staiht woller vör Gericht… „Ein Geständnis werden wir strafmildernd berücksichtigen“ hörd hei. „Jao-jao“, giff hei trügger, „denn Schnack kenn ick. Dor bin‘ck all maol up rienfalln.“
Villich toulaote… Bennard un Harm draopt sick nao lüttke füfftaihn Johr eis woller. „Kiek an Bennard, wie gaiht, biss du uck einspännig bläben?“ „Nä, ick fäuher all‘n gans Tied tweispännig. Ick häbb all vör fiew Johrn hieraot‘t.“„Jao, wann häss dann dien Fraou kenn‘n lehrt?“ Bennard kick gans bedreuwt ut: „Naodem ick‘se hieraot har..!“
„15 Jaohr sünd wi jetzt all tousaome“, sägg sei, „willt wi nich endlich hieraoten?“ Sägg hei: „Menns denn, us nimmp noch einer…“
In välen Ehen wör‘t bäter, wenn dei Frou weniger räden un dei Kerl öfters touhörn dö…