Wat för’n Mallör mit denn Verkehr… KW /27
Bollmanns Libett will´n Führerschien maoken….„Dat maok ick mit Lünks“, wör sei van sick äöwertügt. Doch wi dat in Läben so is, dei eiersde Panne, dei Erste Hilfe Kurs wackelt all. Dei Leiter fraogt: „Wat maokt gi mit ein‘n, dei ein Hitzschlag krägen häff?“ Libett äöwerlegg kott, wi stünd dat noch in dat Heft, un sägg: „Ick legge ehm in‘n Schatten un maok‘n kolt..!“
„Na Libett, häss du dat bi dei Fohrprüfung aals richtig maokt?“, fraogt ehre Naoberschke, as sei trügge kummp. „Schinnt so,“ schnaut sei trügge, „dei Fohrlehrer sä, ick schull üm dei Kunsstücke noch maol wiesen...“
Nu hätt sei et bi’t drütte Maol doch schafft. Sei köfft sick ein gebruuktet Auto un düst los. Toufällig wedd dor´ne neie Telefonleitung legg un dei Arbeiters klattert jüss dei Masten hoch. „Oh Gott“, denkt sei, „häbbt dei aal Angst, so schlecht fäuher ick doch gornich…“
Nu kummp sei mit ehre Kiste inne Verkehrskontrolle… Dei Polizist äöwerprüft dat Auto:„Dei Tachometer is doch kaputt, dor weiss doch nich, wi schnell du fäuhers“, muult hei Libett an. „Ick gaoh woänners nao“:sägg Libett ruhig, „bi füfftig fang dei Stosstangen an tou klappern, bi 80 dei Dörns un bi Hunnert Oma´…“
Dat wör’t vandaoge. Denn Computer isset tou heit worn, hei will nich mehr…