21.10.26
As Foutballfan dou ick aals läsen, wat dor äöwer schräben wedd. Dor kriggs dann uck mit, obwohl man et gornich wäten will, wi dor mit Geld „rümmeschmäten“ wedd.
Dei Zaohlen sünd as „Normalbürger“ sowieso nich tou begriepen. Datt man äöwer haupt ein Mensch koopen kann, hört sick all wi inne Sklaoventied an. Un wi kann toun Beispill ein Späler in Brämen 2 Miilionen un in München 100 Millionen kossten, obwohl beide Späler dat Süfftige maokt?
Dann mags am leiwsten kien Foutball mehr seihn. Aower man kummp dor nich an vörbi. Vandaoge is mi ein wieterer Vergliek upfalln. Dor is dei Späler Ronaldo, CR7 nennt hei sick, tou’ne Geldstraofe van 255 Euro verurdeielt worn, weil hei siene Arbeit verwegert un einfach wegloopen is.
Wenn man dat in Vergliek tou ähnlicken Fällen sütt, möss et dorför ein Straofe van drei Monatsgehälter gäben. Un dorut sünd et 255 Euro worn? Opa har sägg: Dann wör dat jo ein“ armen Blout“!
Wenn man dann hört, dat „dei arme Blout“dei up’n Dag poor Dusende, poor Taihndusende, off noch mehr krigg, dann denk ick…
Dann denk ick leiwer an Jan, denn Wandergesellen. Hei möss vör Gericht, weil hei klaut har. „Kann ick“, har hei denn Richter fraogt, „wenn ick dei Straofe affsäten häbb, dei Böxen ümmetuschken?. Dei wör twei Nummern tou groot!„